Apude estas ekranofoto de la Dosiero-menuo. Mallonge: 'Nova' komencas novan
dokumenton; 'Malfermu' estas uzata por elekti kaj malfermi ekzistantan dokumenton;
'Konservu' konservas la redaktatan dokumenton al disko; 'Konservu kiel' estas uzata
por konservi dokumenton sub nova nomo aŭ kun nova signokodo; 'Presu' presas la
dokumenton; kaj 'Fermu' fermas la programon. Malfermado kaj konservado estas
priskribitaj pli detale sube.
Sub la menuero 'Fermu' estas listo de ĝis 16 laste redaktitaj dosieroj. Se malfermota dosiero estas en la listo, vi povas elekti ĝin rekte de tie.
Iuj funkcioj de la Dosiero-menuo estas aktivigeblaj per reg-klavado. Ekzemple, por konservi la redaktatan dokumenton al disko, tenu la reg-klavon premita kaj tajpu la s-klavon (ctrl‑s). Simile, tajpu ctrl‑o por malfermi dosierojn, kaj ctrl‑p por presi. (Ĉe Makinstoŝoj: cmd‑s, cmd‑o kaj cmd‑p.)
Plie, Simredo havas tri butonojn en la iltrabo por aktivigi dosierajn funkciojn.
La unua butono, kiu reprezentas blankan folion de papero, aktivigas la funkcion
'Nova'; la dua, malfermiĝanta dosierujo, aktivigas 'Malfermu'; kaj la tria,
kiu reprezentas memor-bastoneton, aktivigas la funkcion 'Konservu'.
Por efike uzi Simredon, necesas kompreni terminojn kiel 'Unikodo', 'UTF‑8', 'du-bajta', ktp. Se vi ne konas ĉi tiujn terminojn, mi rekomendas ke vi leĝu la suban artikolon pri signokodaj normoj, antaŭ ol daŭrigi legadon ĉi tie:
La funkcio 'Malfermu' aperigas dosierodialogon similan al la suba. Elektu dosierujon kaj dosieron, kaj surklaku sur la butono 'Bone'. ('Cancel' signifas 'Rezignu'. Ial ne eblis ŝanĝi la tekston de tiu butono.)
Sekve, dialogo pri signokodo eble aperos (dekstre). La celo de ĉi tiu dialogo estas
indiki al Simredo la signokodon aŭ formaton de la dosiero, por ke Simredo konvertu ĝin
al sia interna formato. (Interne, Simredo kodigas karaktrojn per Unikodo.)
Se, post malfermo, via dokumento aperos koruptita, estas ebleco ke vi elektis malĝustan signokodon. Aŭ, se via teksto enhavas neLatinajn literojn, eblas ke la dokumento estis ĝuste ŝargita, sed la tiparo ne enhavas la necesajn literojn. Provu ŝanĝi la tiparon. (Klavu ctrl‑a por elekti la tutan dokumenton, kaj elektu pli taŭgan tiparon de la supra trabo.)
Iuj signokodoj kaj formatoj (RTF, UTF‑16 kaj kriptigitaj dosieroj) estas aŭtomate rekoneblaj laŭ la enhavo. Kiam Simredo kapablas determini la signokodon aŭ formaton de dosiero, ĝi malfermas ĝin sen montri dialogon al la uzanto.
Kiam Simredo ne povas certe identigi signokodon aŭ formaton, ĝi montras Signokodo-dialogon kun UTF‑8 antaŭelektita. Vi povas surklaki sur 'Bone', se tio taŭgas, aŭ elekti alian signokodon. Por lingvoj skribitaj per Latin-baza alfabeto, UTF‑8 estas rekomendinda.
Simredo montras la nomon kaj originalan formaton de redaktata dosiero ĉe la supro de la program-kadro. En la ekranofoto dekstre, 'poem.txt' en la dosierujo '/Users/user/Desktop' estis malfermita kiel UTF‑8‑a dosiero.
La funkcio 'Konservu' elskribas redaktatan dokumenton. Laŭ la supra ekzemplo,
ĝi skribus al '/Users/user/Desktop/poem.txt', per la formato UTF‑8.
Nove kreita dokumento havas nek nomon nek signokodon. Kiam oni konservas novan dokumenton, Simredo unue montras dialogon por demandi la signokodon. Ĉi tiu dialogo (dekstre) estas iom malsama al tiu kiu aperas kiam dokumento estas malfermita; ĝi montras liston anstataŭ falmenuon.
Elektu signokodon, kaj surklaku sur 'Bone'. (Aŭ sur 'Rezignu', por ĉesi konservi la dokumenton.)
Dosierodialogo aperos (simila al tiu kiu aperas kiam oni malfermas dokumenton). Elektu dosierujon, entajpi nomon por la dokumento, kaj surklaku sur la butono 'Bone'.
La listo de signokodoj listigas pli ol cent elektojn. Se vi ne certas kiun elekti, jen du punktoj por konsideri.
Se vi volas konservi la stilon de via dokumento, tio estas, la tiparojn, tiparajn grandecojn, kursivecon, ktp., elektu RTF-on (Riĉa Teksta Formato). RTF estas interŝanĝebla formato kiun ĉiuj vort-procesiloj devas subteni. La aliaj formatoj listigitaj estas ĉiuj simplaj tekstaj formatoj, kiuj ne registras stil-informojn.
Por ĉiuj lingvoj kiuj estas skribataj per Latin-baza alfabeto, UTF‑8, kompaktigita formo de Unikodo, estas rekomendinda. La ISO‑8859 serio (Latin‑1, 2, ktp.) estas evitinda, kiam tio eblas.
Per la funkcioj 'Malfermu' kaj 'Konservu kiel', eblas konverti dosierojn inter multaj formatoj. Ekzemple, por konverti japanan tekston de Shift‑JIS al EUC‑JP, malfermu la dosieron, konvertante ĝin de Shift‑JIS, kaj uzu 'Konservu kiel' por konverti la signokodon al EUC‑JP.
Bonvolu rimarki ke iuj konvertoj povas korupti dosieron. Vi povas konservi japanan dokumenton per Shift‑JIS aŭ EUC‑JP senprobleme, sed se vi konservus ĝin per Latin‑1, la japanaj signoj estus detruitaj, ĉar Latin‑1 estas unu-bajta signokodo kiu ne difinas kodojn por japanaj signoj.